Skuldatryggingaálag bankanna hækkar á ný

Skuldatryggingaálag bankanna stígur nú á ný eftir að hafa lækkað hratt undanfarna mánuði. Fram kemur í Morgunkorni Glitnis að skuldatryggingaálagið hafi náð sögulegum hæðum í mars þegar álag Kaupþings og Glitnis komst yfir 1.000 punkta og skuldatryggingaálag Landsbankans fór upp í 800 punkta.

Var hækkunin rakin til árása vogunarsjóða á íslenska hagkerfið sem Fjármálaeftirlitið hefur nú til athugunar. Skuldatryggingaálagið tók svo að lækka í kjölfarið og var í kringum 440 punkta hjá Kaupþingi í maí, um 400 punkta hjá Glitni í kringum 230 punkta hjá Landsbankanum.

Í síðustu viku tók álagið hins vegar að stíga á ný og stendur skuldatryggingaálag Kaupþings nú í 525 punktum, álag Glitnis er í 500 punktum og Landsbankans í 285 punktum.

„Íslensku bankarnir eru þó langt frá því að vera einir um þessa þróun því að Itraxx vísitalan sem mælir þróun skuldatryggingaálags stærri fyrirtækja í Evrópu hækkaði einnig í síðustu viku. Vísitalan stendur nú í 80 punktum en var í 60 punktum í byrjun maí. Þessi þróun er vísbending um að áhættufælni á heimsvísu sé að aukast á ný. Hækkandi olíuverð og vaxandi ótti þess efnis að tímabil langvarandi stöðnunar sé framundan í bandarísku efnahagslífi er talið eiga stóran þátt í þeirri þróun," segir í Morgunkorninu.