Vel heppnað útboð á ríkisbréfum

Tilboð að nafnvirði um 44 milljarðar króna bárust í ríkisbréf sem Seðlabanki Íslands bauð út í gær.

„Í stuttu máli má segja að útboðið hafi verið vel heppnað og að viðtökur hafi verið í samræmi við væntingar. Krafa þessara tveggja flokka hefur hækkað um 114 og 178 punkta frá því tilkynnt var um stækkun þeirra síðastliðinn fimmtudag. Við teljum líklegt að stækkun þriggja stystu flokka ríkisbréfa eigi eftir að leiðrétta aðeins verðlagningu þeirra, að minnsta kost til skamms tíma. Að þessu útboði loknu á enn eftir að stækka stystu þrjá flokka ríkisbréfa um 50 ma.kr. samtals samkvæmt tilkynningu stjórnvalda. Upplýsingar um hvenær efnt verður til annars viðbótarútboðs og þá í hvaða flokkum liggja ekki enn fyrir," segir í Morgunkorni Glitnis.