Tæplega 40% samdráttur á nýskráningum fólksbíla í maí

Nýskráningar fólksbíla drógust saman um 38% í maí frá fyrra ári samkvæmt tölum frá Umferðastofu. Fjöldi nýskráðra fólksbifreiða í maí sl. var 1.206 miðað við 1.950 í maí í fyrra og 1.756 í maí árið 2006.

Greining Kaupþings fjallar um þessa þróun í Hálf fimm fréttum sínum. Þar segir að nýskráningar jukust á fyrstu mánuðum ársins en sú aukning er tilkomin vegna pantana sem gerðar voru á síðustu mánuðum ársins í fyrra.

Samdrátturinn er því að koma fram núna og ber hann hratt að. Vænta má frekari samdráttar í nýskráningum á næstu mánuðum í kjölfar almenns samdráttar í hagkerfinu.

Greiningin reiknar með samdrætti í einkaneyslu á árinu. Gera má ráð fyrir að hægi á vexti einkaneyslu á fyrsta fjórðungi ársins og hann verði minni en á fjórða ársfjórðungi 2007.

Greiningin spáir í framhaldinu að enn frekar hægi á einkaneyslu þegar líða tekur á árið og að samdráttur í einkaneyslu verði 2,8% fyrir árið í heild.