Keyrði á vegg til að sýna sig fyrir kærustunni

Veðrið undanfarnar vikur hefur glatt margan bílaáhugamanninn, en þeir geta nú æft handbremsubeygjur á snjó og ís líkt og aldrei fyrr. Vísi barst í dag myndband úr öryggismyndavél á bílaplani R. Sigmundsson frá 20. janúar þar sem stoltur pickup eigandi sýnir listir sýnar, með misjöfnum árangri.

Sögunni fylgdi að maðurinn hafi komið daginn eftir með skottið milli lappanna og beðist afsökunar. Hann gaf þá skýringu á athæfinu að hann hafi ætlað að sýna nýju kærustunni hvað hann væri klár að spóla í hringi. Kærastan mun hafa hlegið að honum alla leiðina heim.

Kona á skiptiborði R. Sigmundssonar var með böggum hildar þegar Vísir ætlaði að leita viðbragða þeirra við atvikinu. Hún sagði að ekki yrði sagt orð um málið, en benti á að sá sem færi með málið yrði erlendis næstu vikuna.