Íbúðalán innlánsstofnana minnkuðu um 30% milli mánaða

Í maí námu ný íbúðalán innlánsstofnana alls um 670 millljónum kr. sem er um 30% samdráttur frá apríl. Þá dróst fjöldi lánanna saman um svipað hlutfall en samtals voru 76 ný íbúðalán veitt af innlánastofnunum í maí.

Greining Kaupþings fjallar um málið í Hálf fimm fréttum sínum og byggir á nýjustu tölum Seðlabankans. Segir greiningin að ljóst sé að háir stýrivextir og almenn lausafjárþurrð hafa dregið úr jafnt eftirspurn sem og framboði lánsfjár og því ekki að undra að jafn rólegt sé um að litast á fasteignamarkaði og raun ber vitni.

Fram kemur að Íbúðalánasjóður heldur þó sínum sessi og er síður en svo að draga saman seglin. Íbúðalánasjóður lánaði alls 4,8 milljarða kr. til íbúðakaupa í maí en það er rétt undir meðaltali síðustu fjögurra ára.

"En þrátt fyrir að íbúðalánasjóður haldi sínu striki er kólnunin augljós. Minni umsvif á fasteignamarkaði birtast einna helst í því að kaupsamningar á höfuðborgarsvæðinu voru u.þ.b. 260 í maí samanborið við 969 fyrir ári," segir greining Kaupþings