Íslenskir neytendur orðnir verulega svartsýnir

Íslenskir neytendur eru svartsýnir á stöðu og horfur í efnahags- og atvinnulífi um þessar mundir. Væntingavísitala Gallup, sem birt var í morgun, mælist 67,9 stig í júní og hefur lækkað um 17,9% frá fyrri mánuði.

Greining Glitnis fjallar um væntingarnar í Morgunkorni sínu. Þar segir að um fjórða mánuðinn í röð sé að ræða sem vísitalan mælist undir 100 stigum sem þýðir að fleiri neytendur séu svartsýnir en bjartsýnir.

Væntingar neytenda hafa dregist hratt saman síðan í fyrrahaust og er væntingavísitalan nú 53% lægri en á sama tíma fyrir ári síðan. Vísitalan hefur aðeins tvisvar mælst lægri en nú en það var í síðustu efnahagslægð sem hagkerfið gekk í gegnum, eða í október og nóvember árið 2001.

Allar undirvísitölur væntingavísitölunnar lækka nú á milli mánaða. Vísitalan fyrir stórkaup lækkar nú um 11% á milli ársfjórðunga. Hefur vísitalan lækkað jafnt og þétt frá síðasta sumri, þegar lausafjárkrísan braust út. Undirvísitölurnar fyrir bifreiðakaup, íbúðakaup og utanlandsferðir lækka allar og eru nú í eða nálægt sögulega lágmarki.