Baugur og Fons græða 14 milljarða á Booker-sölu

Milton, félag Baugs Group og Fons, hefur selt 31,4% hlut sinn í heildsölukeðjunni Booker Group. Áætlaður söluhagnaður er um 14 milljarðar króna samkvæmt heimildum Vísis. Baugur á 71% hlut í Milton en Fons 29%.

Gunnar Sigurðsson, forstjóri Baugs, staðfesti í samtali við Vísi að salan væri gengin í gegn. "Það voru áhugasamir fjárfestar sem vildu kaupa í félaginu. Okkur fannst þetta réttur tími til að fara út. Við innleysum góðan hagnað með þessari sölu og síðan er þetta félag í heildsölubransanum sem fellur ekki að þeirri framtíðaráætlunum Baugs að einbeita sér að smásölu," segir Gunnar.

Baugur og Fons keyptu Big Food Group árið 2005 ásamt íslenskum bönkum og fjárfestum. Skömmu eftir það var fyrirtækinu skipt upp í Iceland annars vegar og Booker hins vegar. Vöxtur þessara félaga hefur verið ævintýralegur á þessum þremur árum því heildarverðmæti Booker í dag er það sama og allar Big Food Group samsteypunnar fyrir þremur árum eða um 54 milljarðar.

Greint var frá því breska dagblaðinu Sunday Telegraph á sunnudag að breski fjárfestirinn August Munro hefði áhuga á því að kaupa Mosaic Fashion sem Baugur á. Aðspurður um það sagði Gunnar að rangt. "Þetta eru eintómar getgátur og við erum ekki að fara selja Mosaic," segir Gunnar.