Starfsfólk Iceland Express beðið um að taka launalaust leyfi

Lággjaldaflugfélagið Sterling, sem er að stærstum hluta í eigu Fons sem einnig rekur Iceland Express hyggst segja upp 200 manns vegna hækkandi eldneytisverðs. Jafngildir þar um 20% fækkun starfsfólks. Iceland Express hefur einnig gripið til aðgerða til að hagræða í rekstri.

Óhætt er að segja að fluggeirinn sé í krísu um þessar mundir en skemmst er að minnast uppsagna hjá Icelandair í síðustu viku þar sem yfir 240 manns var sagt upp störfum. Í samtali við Markaðinn í dag, sagði Matthías Imsland, forstjóri Iceland Express að uppsagna væri ekki að vænta hjá félaginu. Hins vegar hafi félagið gripið til ýmissa aðgerða vegna ástandsins. Til að mynda hefur fólk verið beðið um að taka sér launalaus frí og/eða minnka vinnu úr 100% niður í 50%. Þá hefur ekki verið ráðið í stað þeirra sem hafa hætt eða þeirra sem hafa farið í barneignafrí. Með þessu móti hefur stöðugildum fækkað um 24 frá sama tíma í fyrra.

Matthías segir starfsfólk hafa tekið aðgerðum þessum vel en burtséð frá þeim tíu sem var sagt upp í þarsíðasta mánuði, er ekki frekari uppsagna að vænta segir Matthías.