Íslenskir fjárfestar kaupa apótekakeðju í Úkraínu

Íslenskir fjárfestar undir forystu Jónasar Tryggvasonar hafa fest kaup á apótekakeðjunni Salve í Úkraínu. Þetta kemur fram í tilkynningu frá MP Fjárfestingarbanka sem hafði milligöngu um viðskiptin.

Að sögn Jónasar, sem starfaði áður sem framkvæmdastjóri Actavis í Mið-og Austur-Evrópu og Asíu, er um að ræða keðju 20 apóteka í Vestur-Úkraínu í borgunum Lviv og Lutsk. Apótekamarkaðurinn í Úkraínu er í hröðum vexti og á næstu misserum munu sameiningar smærri eininga á markaðinum eiga sér stað segir einnig í tilkynningunni.

Jónas segir að markmiðið með kaupunum á Salve sé að ná fótfestu á vaxtarmarkaði og taka þátt í því samruna- og stækkunarferli sem nú sé óhjákvæmilegt. Aðstæður í Úkraínu feli í sér mikil tækifæri fyrir smásölufyrirtæki og Salve muni vaxa með samruna við aðrar keðjur, kaup á einstökum apótekum og opnun nýrra. Miðað við þá reynslu sem Jónas hefur af störfum sínum í Austur-Evrópu séu framtíðarhorfur sérlega góðar í Úkraínu.