Matvara hækkaði minna og húsnæðisverð lækkaði

Hjördís Vilhjálmsdóttir, hagfræðingur hjá greiningu Glitnis, segir að lítils háttar frávik milli verðbólguspár greiningarinnar og mælingarinnar sem birt var í morgun skýrist m.a. af því að matvara hækkaði minna en greiningin átti von á og húsnæðisverð lækkaði.

Hjördís segir að þótt það sé í sjálfu sér ánægjulegt að verðbólguspá greiningarinnar hafi verið ívið hærri en mælingin eigi hún von á að frávikið komi fram í næstu mælingu.

„Í næstu mælingu mun hin mikla veiking á krónunni undanfarnar tvær vikur hafa áhrif," segir Hjördís. „Hins vegar tel ég að veikingin á genginu fyrr í ár sé að fullu komin fram."

Hvað matvöruna varðar og minni hækkun þar en menn töldu að yrði má nefna að lambakjöt reyndist ódýrara. Þar var um að ræða sölu á eldri birgðum með afslætti en salan á nýslátruðu var ekki að fullu komin í gang.