Nýja Kaupþing unir ekki kaupum Bakkabræðra í Exista

Stjórn Nýja Kaupþings banka hf. unir ekki sölu stjórnar Exista hf. á nýjum hlutum í félaginu til Kvakks ehf./BBR ehf., eignarhaldsfélags í eigu stjórnarformanns Exista og bróður hans. Stjórn bankans hafði undirbúið ferli sem miðaði að því að taka yfir stjórn Exista í því skyni að verja hagsmuni bankans.

Í tilkynningu frá Nýja Kaupþingi segir að á síðastliðinn sunnudag hafi Kaupþing upplýst stjórnarformann Exista um þessi áform bankans og óskað jafnframt eftir að boðað yrði til hluthafafundar hjá félaginu. Þessari ósk hafi verið fylgt eftir formlega með bréfi frá Kaupþingi í morgun.

Í tilkynningu frá Nýja Kaupþingi segir að stjórn fyrirtækisins geri alvarlegar athugasemdir við þessi vinnubrögð stjórnar Exista og munio leita allra leiða til að fá þessum áformum hnekkt.