Bakkabræður að eignast 87,5% í Existu

Bræðurnir Ágúst og Lýður Guðmundssynir eru að eignast 87,5 prósent í Exista ef fer sem horfir. Félagið verður brátt afskráð úr Kauphöll Íslands.

Stjórn Existu, þar sem Lýður er stjórnarformaður, á nú í viðræðum við einkahlutafélag í eigu Ágústs og Lýðs um kaup Exista á öllu hlutafé í Kvakki, sem er í eigu þeirra bræðra, og í framhaldi af því að nýta heimild hluthafafundar Exista frá 30. október um að auka hlutafé í félaginu um 50 milljarða hluta til greiðslu fyrir hluti í Kvakki ehf. Viðræðurnar fela í sér að Ágúst og Lýður leggi handbært fé Kvakks til Exista í skiptum fyrir nýtt hlutafé í félaginu. Lýður hefur sagt að staða Exista í dag sé í besta falli óljós og útilokar ekki að félagið fari í þrot innan tíðar.

Hluthafafundur Exista verður haldinn fyrir áramót en nákvæm tímasetning hefur ekki veirð gefin út. Þar verður lögð verður fram tillaga um niðurfærslu á hlutafé félagsins. Bakkabraedur Holding, félag Ágústs og Lýðs, á í dag 45 prósent í Exista. Með hlutafjáraukningunni eykst hlutur þeirra í 87,5 prósent. Kista, fjárfestingafélag Sparisjóðanna, sem er næststærsti hluthafi Exista í dag með 5,17 prósent mun eiga 1,14 prósent eftir hlutafjáraukninguna.