Enn sekkur Eimskip

Eimskip hefur lækkað mest allra fyrirtækja í Kauphöllinni það sem af er degi. Félagið lækkaði um 1,45 prósent við opnun markaða en þegar hefur liðið á daginn hefur gengi félagsins lækkað enn frekar, eða um 5,31 prósent. Síðustu fimm daga hefur félagið lækkað um tæp 34 prósent í Kauphöllinni, mest í gær, þegar félagið lækkaði um 16,5 prósent.

Í morgun voru bréf í Eimskipafélaginu sett á athugunarlista í Kauphöllinni. Þetta var gert í tengslum við skilyrði Kauphallarinnar fyrir töku hlutabréfa til viðskipta, vegna umtalsverðrar óvissu varðandi verðmyndun vegna hættu á ójafnræði meðal fjárfesta, líkt og sagði í tilkynningu.

Enn er verið að vinna að fjármögnun kaupa á XL Leisure Group en Eimskip er enn í ábyrgð fyrir 280 milljóna dala láni félagsins.

Eimskip seldi XL Leisure Group í október árið 2006 fyrir 450 milljónir bandaríkjadala, jafnvirði 30,6 milljarða íslenskra króna á þávirði. Félagið var þá leiguflugs- og ferðaþjónustuhluta Avion Group, nú Eimskipafélagsins.

XL Leisure er þriðja stærsta fyrirtæki í Bretlandi á sviði ferðaþjónustu. Fyrirtækið tapaði 24 milljónum punda á síðasta rekstrarári, en það jafngildir um 3,6 milljörðum íslenskra króna. Skuldir félagsins fóru úr 17 milljörðum í 31 milljarð íslenskra króna.

Halldór Kristmannsson hjá samskiptasviði Eimskips, segir að forsvarsmenn félagsins tjái sig ekki um málið að svo stöddu, en að áfram verði unnið að lausn þess.