Nyhedsavisen gjaldþrota: Fjögurra milljarða tap Stoða Invest

Stoðir Invest munu væntanlega þurfa að afskrifa um fjóra milljarða vegna gjaldþrots Nyhedsavisen. Þórdís Sigurðardóttir, forstjóri Stoða Invest, vildi ekki nefna neinar tölur í því sambandi.

„Við erum mjög undrandi á því að þetta hafi farið svona, sérstaklega í ljósi að við töldum verkefnið vera fjárhagslega tryggt eftir síðsutu samninga " segir Þórdís um gjaldþrot Nyhedsavisen sem greint var frá í gærkvöld.

Aðspurð um ástæður gjaldþrotsins segir Þórdís að Morten Lund, sem átti 85% í blaðinu, hafi skuldbundið sig til að koma með nýja fjárfesta inn í reksturinn í júlí en það hafi því miður ekki gengið eftir í því erfiða árferði sem verið hefur í Danmörku og víðar á undanförnum mánuðum.

Stoðir Invest hafa eytt miklum fjármunum í rekstur blaðsins og er fjárhagslegt tjón félagsins samkvæmt útreikningum Vísis ekki undir þeim fjórum milljörðum sem félagið hefur lánað blaðinu í útgáfutíð þess. Þórdís vildi ekki staðfesta töluna.