Greiðslukortavelta bendir til svartsýni hjá neytendum

Samkvæmt tölum Seðlabankans nam greiðslukortavelta í maí 59,9 milljörðum kr. en þar af nam velta með debetkort 33,6 milljörðum kr. og velta með kreditkort 26,2 milljörðum kr.

Heildarvelta debet og kreditkorta dróst saman á milli mánaða um 2,4% að raunvirði, en hægt hefur á vexti kortaveltu undanfarna mánuði þrátt fyrir að töluverðar sveiflur séu á milli mánaða.

Greining Glitnis fjallar um tölurnar í Morgunkorni sínu. Þar segir að lakari efnahagshorfur, óvissa á fjármálamörkuðum og aukin svartsýni neytenda virðast leiða til þess að heimilin í landinu hafa gripið til aukins aðhalds. Velta með kreditkort dróst saman um 7,3% að raunvirði milli maí og apríl en jókst með debetkort um 1,9%.

Þróun kortanotkunar í verslun, leiðrétt fyrir gengis- og verðbólguáhrifum, þykir gefa góða vísbendingu um þróun einkaneyslu. Verulega hefur hægt á aukningu kortanotkunar undanfarna mánuði samkvæmt þessum útreikningum en maí er fyrsti mánuðurinn þar sem samdráttur mælist frá sama mánuði í fyrra. Reyndar er samdrátturinn í maí allskarpur eða ríflega 8% eftir hóflegan vöxt í mars (0,6%) og apríl (2,5%).