Aflaverðmætið nam 21,8 milljörðum á fyrstu 3 mánuðum ársins

Aflaverðmæti íslenskra skipa nam 21,8 milljörðum kr. á fyrstu þremur mánuðum ársins 2008 samanborið við 25,2 milljarða kr. á sama tímabili 2007.

Þetta kemur fram á vefsíðu Hagstofunnar í morgn. Aflaverðmæti hefur dregist saman um 3,4 milljarða kr. eða 13,5% milli ára. Aflaverðmæti marsmánaðar nam 10,0 milljörðum miðað við 9,6 milljarða í mars 2007.

Aflaverðmæti botnfisks var í lok mars orðið 17,1 milljarðar kr. sem er 6,2% samdráttur frá sama tímabili í fyrra þegar verðmæti botnfiskafla var 18,2 milljarðar kr..

Verðmæti þorskafla í mars var 4,4 milljarðar kr. og dróst saman um 1,1%. Aflaverðmæti ýsu nam 1,4 milljörðum kr., jókst um 2,4% og verðmæti ufsaaflans var 460 milljónir kr. sem er svipað og í mars 2007.

Verðmæti flatfiskafla í mars nam 378 milljónum kr. og jókst um 15,9%. Aflaverðmæti uppsjávarafla jókst um 22,7% og nam 2,1 milljörðum kr..

Það sem af er ári er heildarverðmæti uppsjávarafla 3,8 milljarðar kr., samanborið við 5,9 milljarða kr. árið 2007. Munar þar mestu um verðmæti loðnu sem nam rúmum 1,7 milljörðum kr. fyrstu þrjá mánuði ársins samanborið við rúma 4,2 milljarða kr. á sama tíma árið 2007