Biðin eftir lántöku ríkissjóðs orðin kostnaðarmeiri en lánakjörin

Leiða má gildum rökum að því að biðin eftir margboðaðri lántöku ríkisins og Seðlabankans til að styrkja gjaldeyrisvarasjóð bankans sé farin að kosta mun meira en nemur kostnaðinum við lántökuna.

Menn í viðskiptaheiminum eru orðnir ansi langeygir eftir fyrirhugaðri lántöku ríkissjóðs. Það að þessi 500 milljarða króna heimild var ekki notuð strax af ríkisstjórn og Seðlabankanum til að styrkja gjaldeyrisforða landsins hefur leitt til meiri lækkana á gengi krónunnar og hlutabréfa en ella hefði orðið. Um þetta eru viðmælendur Vísir nokkuð sammála.

Ríkissjóði og Seðlabanka er að vísu nokkur vorkunn því skuldatryggingarálag ríkisins er í hæstu hæðum og því ljóst að lántakan verður kostnaðarsöm. Á móti má spyrja hver verður kostnaður almennings af áframhaldandi falli krónunnar með tilheyrandi verðhækkunum innanlands. Svo ekki sé talað um kostnað fjárfesta af áframhaldandi falli úrvalsvísitölunnar. Og töpuðum skatttekjum ríkissjóðs vegna lélegs gengis félaganna í kauphöllinni.

Viðmælendur Vísis eru sammála um að tækifærið fyrir ríkissjóð og Seðlabankann til að koma 500 milljarða króna heimildinni í lóg hafi verið dagana eftir að hún var samþykkt á alþingi. Þá fór skuldatryggingarálagið undir 200 punkta og hafði ekki verið lægra í langan tíma.

En þetta þótti of hátt og menn ákváðu að bíða. Sú bið hefur gert það að verkum að margumræddur trúverðugleiki íslenska fjármálakerfisins heldur áfram að minnka. „Þessir menn eru einfaldlega að spila með fjöregg fjármálalífsins með þessari bið," segir einn af viðmælendum Vísis.

Krafan sem viðskiptalífið gerir á hendur ríkissjóði og Seðlabankans er að þessir aðilar hysji upp um sig buxurnar og fari í umræddar lántökur strax. Þótt það sé kostnaðarsamt í augnablikinu hlýtur að vera hægt að fá svona stórt lán með breytilegum kjörum þannig að þegar skuldatryggingarálagið fer að lækka á ný njóti þeir góðs af slíku.

Áframhaldandi bið á lántökunni þýðir aðeins óbreytt ástand. En það er víst erfitt að fá skýr svör um stöðuna hvað þetta lán varðar. Spurningar um slíkt eru taldar dónaskapur á stjórnarheimilinu.