Feitum Dönum úthýst úr litlum kirkjum

Íturvaxnir Danir mega eiga vona á því að þeim verði úthýst úr sveitakirkjum þar í landinu áður en þeir leggjast til hinstu hvílu. Prestar í Danmörku hafa lýst áhyggjum sínum af því að nýlegar líkkistur sem eru sérhannaðar fyrir holdmikil lík séu svo breiðar að þær komist ekki í gegnum dyrnar á kirkjum sem hafi verið byggðar á miðöldum.

Poul Joachim Stender, sóknarprestur á Mið-Sjálandi, telur að vandamálið muni aukast í framtíðinni þar sem Danir séu sífellt að verða stærri og kraftmeiri. Inge Lise Petersen, formaður kirkjumálanefndar í Danmörku, segir að lausnin sé ekki fólgin í því að stækka dyrnar á kirkjunum. Það verði einfaldlega að leita í stórar kirkjur þegar íturvaxnir Danir eru jarðsettir.