Hulunni svipt af einum leyndardómsfyllsta tónlistarmanni samtímans

Hulunni var svipt af dubstep tónlistarmanninum Burial í dag. Reyndist hann algjörlega óþekktur piltur frá London en ekki einhver heimsþekktur tónlistarmaður eins og margir höfðu giskað á.

Burial hefur sent frá sér tvær breiðskífur og verið hampað af miðlum á borð við Pitchfork, Guardian, Q og Spin en nýlega var hann tilnefndur til hinna virtu Mercury tónlistarverðlauna.

Alveg frá því að fyrsta plata Burial kom út árið 2006 hefur enginn vitað hver hann í raun væri. Ýmsar getspár voru uppi um hver leyndist á bakvið Burialgrímuna og hafa nöfn listamanna á borð við Aphex Twin og Fatboy Slim borið á góma í því samhengi. The Sun gekk jafnvel svo langt að efna til samkeppni til að finna tónlistarmanninn leyndardómsfulla.

En nú er auðkenni hans loksins orðið opinbert. Var tilkynning þess efnis birt á MySpace síðu kappans. Kom í ljós að maðurinn að bakvið Burial var piltur frá Suður-London að nafni Will Bevan sem vildi einfaldlega fá að gera sína tónlist í friði.