Yfirlýsing frá Hreiðari Má og Sigurði: Engar óeðlilegar millifærslur

Sigurður Einarsson fyrrum stjórnarformaður Kaupþings og Hreiðar Már Sigurðsson fyrrum forstjóri bankans segja að engir fjármunir hafi verið færðir með óeðlilegum eða ólögmætum hætti úr sjóðum bankans, hvorki til eigenda hans né annarra.

Þetta kemur fram í yfirlýsingu frá þeim félögum sem kemur í kjölfar fréttaflutnings um óeðlilegar millifærslur úr Kaupþingi til einstaklinga og félaga í eigendahópi Kaupþings.

Í yfirlýsingunni kemur einnig fram að enginn hagnaður hafi orðið til vegna sérstakra samninga við valinn hóp viðskiptavina bankans eða eigenda.

„Fyrrum stjórnendur eru þess fullvissir að starfsemi bankans hafi alla tíð verið innan þess ramma sem lög og reglur um rekstur hans hafa kveðið á um.

Þeim rannsóknum sem nú standa yfir á starfsemi bankans er því fagnað og vonandi er að til þeirra verði vandað í hvívetna til þess að hið sanna um starfsemi bankans leysi tilhæfulausar sögusagnir sem allra fyrst af hólmi."