Pósturinn og innovit handsala samning um nýsköpun

Pósturinn og Innovit undirrituðu í dag samning um stuðning við nýsköpun á háskólastigi. Samningurinn er tvíþættur.

Hann felur annars vegar í sér að Pósturinn er einn af styrktar og samstarfsaðilum Frumkvöðlakeppni Innovit 2008. Hins vegar felur samningurinn í sér að þverfaglegur hópur háskólanema mun vinna viðamikið nýsköpunarverkefni sem snýr að framtíðarviðskiptaþróun hjá Póstinum.

„Frumkvöðlakeppni Innovit er keppni í gerð viðskiptaáætlana sem nú er haldin í fyrsta sinn fyrir íslenska háskólanemendur að erlendri fyrirmynd. Nú eru 18 viðskiptahugmyndir komnar í undanúrslit en yfir 100 viðskiptahugmyndir voru skráðar til leiks í fyrsta áfanga keppninnar. Í keppninni er lögð megináhersla á að þjálfa upp frumkvöðla og framtíðarstjórnendur íslenskra fyrirtækja úr röðum háskólamenntaðs fólks, en á meðan keppni stendur bjóðast keppendum námskeið og ráðgjöf frá starfsmönnum Innovit," segir í tilkynningu frá Innovit.