Dótturfélag Jarðborana semur um djúpborun í Þýskalandi

Hekla Energy, nýstofnað dótturfélag Jarðborana í Þýskalandi, og þýska félagið Exorka hafa samið um samstarf um borframkvæmdir þar í landi þar sem leitað verður jarðhita.

Fram kemur í tilkynningu frá Jarðborunum að samningur þar að lútandi hafi verið undirritaður í München í síðustu viku og er ætlunin að bora mjög djúpar jarðhitaholur í Suður-Þýskalandi sem verða sex talsins. Áætlað er að dýpt hverrar holu verði allt að 5.000 metrum og er það mesta dýpt sem íslenskt fyrirtæki hefur nokkru sinni borað.

Búið er að flytja stærstan hluta af nýjum hátæknibor Heklu Energy á borsvæði Exorku en vinnu við tengingar og frágang verður lokið fyrir jól. Reiknað er með að sjálfar borframkvæmdirnar hefjist að fullu strax eftir áramót. Verðmæti samningsins er um 1,5 milljarðar króna sem hækkar í 3,0 milljarða króna, nýti Exorka ákvæði þess efnis að framlengja verkefnið um 6 holur til viðbótar.

Hekla Energy mun bora fyrstu þrjár holurnar í Mauerstetten sem er u.þ.b. 100 km suðvestur af München en í Mauerstetten hefur Exorka í hyggju að reisa fyrsta raforkuver sitt. Áætlað er að þessum borframkvæmdum ljúki fyrir árslok 2008.

Það er fyrst á um fimm kílómetra dýpu sem reiknað er með hita á bilinu 125-130 gráður, en Exorka mun nýta hann til að framleiða rafmagn með svonefndri Kalina-tækni. Þessi tækni felst í því að raforka er framleidd við kælingu á heitu vatni.