Fitch staðfestir lánshæfi Straums-Burðaráss

Fitch Ratings staðfesti í dag lánshæfiseinkun Straums-Burðaráss fjárfestingabanka hf. Langtímaeinkunn bankans er BBB- og eru langtímahorfur stöðugar.

Skammtímaeinkunn fyrir félagið er F3, óháð einkunn, C/D og stuðningseinkunn 3. Í tilkynningu frá Straumi segir að það sé álit Fitch að „einkunnin endurspegli fjárhagslegan styrk Straums, öran vöxt tiltölulega stöðugra tekna, aukna landfræðilega dreifingu bæði eignasafns og tekna og þá staðreynd að áhættustýring og upplýsingagjöf hafi verið efld til muna að undanförnu."

Þá er einkunnin sögð markast af því að tiltölulega lítil reynsla sé komin á starfsemi Straums í núverandi mynd, hlutabréfaeign bankans sé enn mikil, einstakir liðir vegi þungt í efnahagsreikningnum og óvissa sé um hvernig gangi að samþætta einingar á ólíkum mörkuðum. „Fitch tekur fram að samsetning rekstrareininga og áhættu hafi batnað en bætir við að það eigi eftir að koma fram í sterkari efnahagsreikningi og rekstrarafkomu. Haldi bankinn áfram að bæta sig að þessu leyti renni það stoðum undir að einkunn hans verði hækkuð; að sinni verði hins vegar fylgst með áhrifum hinna erfiðu aðstæðna á markaði á bankann."

„Loks er því lýst yfir að lausafjárstaða Straums sé góð og að fjárhagslegur styrkur bankans veiti honum umtalsverðan sveigjanleika til að vaxa, eins og stefnt sé að," segir í tilkynningu frá Straumi.