Merkri sögu Ungdomshuset að ljúka

Ungdomshuset á Jagtvej 69 var byggt árið 1890 og var upphaflega ætlað sem baráttumiðstöð fyrir verkalýðshreyfinguna í Kaupmannahöfn og kallaðist þá Da Folkets Hus. Hreyfingin starfaði í húsinu í hálfa öld og þjónaði þeim tilgangi að vera bæði vettvangur fyrir baráttu verkalýðsins sem og samkomuhús. Árið 1980 settist hópur ungmenna að í byggingunni og eftir tveggja ára átök samþykktu yfirvöld loks að afhenda þeim lyklana að húsinu. Þetta var upphafið að stofnun Ungdomshuset sem varð vinsæll samkomustaður yngri kynslóðarinnar í Kaupmannahöfn. Þar hafa ungmenni getað sótt tónleika, kvikmyndasýningar, fundi, kaffihús og listviðburði svo fátt eitt sé nefnt. Starfsemin er eingöngu rekin af sjálfboðaliðum og allur ágóði fer í rekstur og viðhald hússins. Í gegnum tíðina hefur Ungdomshuset verið vettvangur fyrir ýmsa listamenn til að koma sjálfum sér og verkum á framfæri.

Árið 1996 brann húsið og borgaryfirvöld töldu ekki ástæðu til þess að gera það upp. Í kjölfarið hófst undirskriftasöfnun meðal íbúa Norðurbrúar sem vildu að húsinu yrði lokað. Í framhaldi að því var húsið sett á sölu árið 2000 og árið eftir keypti kristilega trúfélagið Faderhuset bygginguna. Síðan þá hefur félagið barist hörðum höndum að koma ungmennunum út úr húsinu. Þau hafa aftur á móti ekki viljað yfirgefa húsið sem hefur orsakað málferli milli þeirra og eigenda. Á síðustu árum hafa meðal annars verið skipulagðar nokkrar friðsamlegar mótmælaaðgerðir og endaði ein þeirra með miklum óeirðum í desember á síðasta ári.