Bresk hjón hafa verið látin laus úr fangelsi og sýknuð af því að hafa eitrað fyrir þriggja ára dreng sem þau vildu ættleiða. Ian og Angela Gay voru dæmd í fimm ára fangelsi í janúar árið 2005 fyrir að vera völd að dauða drengsins.
Hinn þriggja ára gamli Christian hafði aðeins verið einn mánuð, til reynslu, á heimili Gay hjónanna þegar hann lést. Dánarorsök hans var alltof mikið saltmagn í blóðinu. Saksóknarinn sakaði hjónin um að hafa eitrað fyrir honum með salti, þegar hann var óþægur. Saltmagnið í blóði hans var svo mikið að heili hans bólgnaði og hann lést.
Ný gögn hafa leitt í ljós að Christian þjáðist af afar sjaldgæfum sjúkdómi sem lýsir sér þannig að saltmagn í blóðinu getur orðið svo mikið að blóðið ofmettist.
