Nýr framkvæmdastjóri upplýsingatæknisviðs Straums

Jim Hill hefur verið skipaður framkvæmdastjóri upplýsingatæknisviðs Straums. Hann heyrir beint undir William Fall forstjóra og hefur aðsetur í London.

Sæmundur Valdimarsson verður áfram upplýsingatæknistjóri starfseminnar á Íslandi og Pekka Virtanen upplýsingatæknistjóri eQ, en báðir taka þeir einnig við nýjum verkefnum á þessu sviði sem ná til bankans í heild, eftir því sem fram kemur í tilkynningu frá Straumi.

„Starfsemi Straums hefur gerbreyst á undanförnum tólf mánuðum, bæði hvað varðar vöruframboð og landfræðileg umsvif, eftir því sem okkur hefur miðað áfram að því marki að verða leiðandi fjárfestingabanki í Mið- og Norður-Evrópu," segir William Fall.

Fall segir að upplýsingatækni sé ein af meginforsendum þess að fyrirtækið geti haldið áfram að færa út starfsemi bankans og stýrt áhættu.