Íhuga að leggja niður Ísafold vegna "ritskoðunar" Jóns Helga

Útgáfufélagið Birtíngur íhugar alvarlega að leggja niður tímaritið Ísafold og sameina ritstjórn þess tímaritinu Nýtt Líf. Samkvæmt heimildum Vísis var þetta á meðal þess sem var rætt á fundi helstu stjórnenda útgáfufélagsins í morgun.

Ástæðan er sú að forsvarsmenn Birtíngs telja alvarlega hafi verið vegið að rekstrargrundvelli Ísafoldar þegar Jón Helgi Guðmundson og fyrirtæki hans, Kaupás, sem reka Nóatún, Krónuna og 11-11, ákvað að taka tímaritið úr sölu eftir að Ísafold birti grein um tengsl Gunnars I Birgissonar bæjarstjóra í Kópavogi við nektardansstaðinn Goldfinger.

Með ákvörðun sinni rifti Kaupás einhliða samningi sínum við Ísafold um að tímaritinu yrði dreift í verslunum félagsins.

Jón Trausti Reynisson, ritstjóri Ísafoldar, vildi ekki staðfesta að heimildir Vísis um málið væru réttar þegar hann var spurður um málið í dag. Hann sagði hins vegar að ekkert stórt tímarit gæti lifað það af að vera ekki á boðstólum í verslunum Nóatúns 11-11 og Krónunnar.

Jón Trausti segist hafa rætt þessi mál við Jón Helga í þrígang án þess að fá nokkra niðurstöðu. "Þriðja samtali okkar lauk á þeim orðum Jóns Helga að við hefðum átt að hugsa okkur betur um áður en við fórum að dreifa óhróðri," segir Jón Trausti.

Eins og Vísir greindi frá fyrr í dag sendi Blaðamannafélag Íslands frá sér tilkynningu um málefni Ísafoldar í dag.

Í henni segir; "Blaðamannafélag Íslands telur óþolandi að áhrifamenn reyni í krafti valds síns, auðæfa eða viðskiptahagsmuna að hafa áhrif á skrif fjölmiðla. Mislíki mönnum umfjöllun fjölmiðla eiga þeir þess kost að leita til siðanefndar Blaðamannafélags Íslands eða dómstóla. Með aðgerðum sínum gagnvart tímaritinu Ísafold lítur út fyrir að stórfyrirtæki á Íslandi sé að beita áhrifum sínum á markaði til að knésetja tímarit og veigri sér ekki við að brjóta gerða samninga til að ná markmiði sínu."

Ekki náðist í forsvarsmenn Kaupás í dag þar sem nú fer fram ársfundur móðurfélags þess, Norvik.