Meirihluti innlána bankanna kemur að utan

Meirihluti innlána íslensku bankanna, eða 51 prósent, kemur frá erlendum aðilum eftir því sem Fjármálaeftirlitið greinir frá. Hlutfallið hefur aukist úr sjö prósentum á aðeins tveimur árum og segir eftirlitið að það megi að mestu rekja til þess að viðskiptabankarnir hafi lagt áherslu á að safna innlánum í erlendum starfsstöðvum sínum.

Þá er bent á að hlutfall innlána af útlánum hafi hækkað úr 31 prósenti árið 2005 í 52 prósent um mitt þetta ár en bankarnir voru einmitt gagnrýndir í fyrra fyrir það að hve litlu leyti þeir fjármögnuðu sig með innlánum.

Bent er á að með auknum innlánum sé fjármögnum bankanna orðin fjölbreyttari en hún var og þeir minna háðir lántöku á alþjóðlegum fjármálamörkuðum.