Vilja seinka skráningu Símans á markað

Stjórn Skipta, sem meðal annars rekur Símann, hefur leitað eftir því við íslenska ríkið að skráningu félagsins á markað verði seinkað vegna þátttöku fyrirtækisins í sölu á slóvenska símanum.

Þegar Síminn var seldur árið 2005 var gert ráð fyrir því að félagið yrði skráð á markað fyrir árslok 2007 og að boðin yrðu til sölu hið minnsta 30 prósent í félaginu.

Í tilkynningu frá Skiptum segir hins vegar að félagið reyni nú að kaupa stóran hlut í Telekom Slovenji. Til stendur að selja nærri helmingshlut þess félags til kjölfestufjárfestis sem muni gera öðru hluthöfum yfirtökutilboð. Slóvenska ríkið heldur þó eftir 25 prósenta hlut. Samtals er því um að ræða allt að 75 próset hlut í Telekom Slovenije.

Skipti segja að það liggi ekki fyrir fyrr en í árslok hvort af kaupunum verður en að félagið hafi átti í bréfaskiptum við Kauphöll Íslands vegna þessa. Hafi forsvarsmenn Kauphallarinnar lýst yfir efasemdum um að setja Skipti á markað á meðan óvissan um þessi kaup á slóvenska félaginu ríki, en Skiptum er meðal annars óheimilt að upplýsa um hvaðeina sem snertir kaupin vegna samkomulags við slóvenska ríkið.

Því sé viss hætta á að fjárfestar muni ekki fá nægjanlega glögga mynd af Skiptum við þessar aðstæður. Vill stjórn skipta því að ríkið heimili að félagið verði skráð á markað á fyrsta ársfjórðungi næsta árs í stað þess að það verði gert fyrir áramót. Þá verði komin niðurstaða í mál slóvenska símans.