Industria hlýtur verðlaun fyrir bestu nýju lausnina fyrir sjónvarp um internetið

Industria hlaut í gær verðlaun frá tímaritinu Global Telecoms, fyrir bestu nýjungina á sviði sjónvarps yfir internet (IPTV) ásamt breskum samstarfsaðila sínum, Inuk Networks. Verðlaunin hlutu fyrirtækin fyrir ,,Freewire" en það er þjónusta sem er ætlað að veita öllum breskum háskólanemum aðgang að stafrænu sjónvarpi um internetið. Þjónustan hefur hlotið góðar viðtökur og er búist við að hún verði innan árs stærsta IPTV dreifingarnet Bretlands með allt að sex milljónir notenda. Jafnframt stefnir Inuk á að bjóða sömu þjónustu til háskólastúdenta í Kanada fyrir lok þessa árs.

Freewire keyrir á Zignal, sem Industria þróaði, alhliða hugbúnaðarlausn fyrir dreifingu á gagnvirku margmiðlunar- og sjónvarpsefni um internetið. Meðal nýjunga sem ekki hafa sést áður í hugbúnaði af þessu tagi er möguleikinn á að taka við gagnvirkum sjónvarpsútsendingum beint í hemilistölvu, án þess að vera með sérstakan afruglara. Þá getur Zignal einnig dreift sjónvarpsefni í þriðju kynslóðar farsíma.

Stefán Baxter, þróunarstjóri Industria og Marcus Liassides, framkvæmdastjóri Inuk Networks, veittu verðlaununum viðtöku fyrir hönd fyrirtækjanna við glæsilega verðlaunahátíð í Whitehall í London í gærkvöld. Viðstaddir hátíðina voru um 180 stjórnendur fjarskiptafyrirtækja um allan heim.

Í tilkynningu frá fyrirtækinu segir Stefán að það sé ánægjulegt að taka við viðurkenningu á sama tíma og stórfyrirtæki á borð við Oracel, Alcatel-Lucent, Huawei Technologies sem eru stærstu birgjar á sínu sviði í fjarskiptageiranum. Þá hafi verðlauning opnað fyrirtækinu dyr inn í spennandi tækifæri í alþjóðlegum verkefnum við uppbyggingu rekstrarkerfa gagnvirkra sjónvarpsveitna, þar sem Zignal leikur aðalhlutverkið.

Industria komst fyrr á þessu ári á topp-50 lista CNBC yfir framsæknustu fyrirtæki Evrópu. Þar var fyrirtækinu lýst þannig að þar færi „líklega sá aðili sem myndi móta þróun samruna stafrænnar tækni og sjónvarps í Evrópu." Meðal þeirra fyrirtækja sem komust á listann ásamt Industria má nefna Skype, Tiscali, Adidas og BMW.

Áður hefur fyrirtækið hlotið verðlaun fyrir framúrskarandi lausnir á sínu sviði og má þar nefna Red Herring 100 Europe verðlaunin árið 2006, en verðlauning hlaut fyrirtækið fyrir hugbúnað fyrir breiðband sem stuðlar að samruna sjónvarps, síma og internetsins.