Mikil bjartsýni ríkir meðal stuðningsmanna íslenska liðsins

Stuðningsmenn Íslenska landsliðsins í handbolta létu vonbrigði gærkvöldsins ekki hafa áhrif á sig og svo virðist sem eitthvað af anda stuðningsmannasamtakanna Í Blíðu og Stríðu hafi nuddast í landann að þessu sinni.

"Stemmingin í fólkinu hérna úti er enn ótrúlega góð þrátt fyrir tapið í gær og fólk er bara bjartsýnt fyrir leikinn gegn Frökkum í kvöld. Menn láta vonbrigðin ekki hafa áhrif á sig og hér er hver einasti maður með bros á vör og hlakkar til Frakkaleiksins," sagði einn íslensku stuðningsmannanna í samtali við Vísir nú eftir hádegið.

Fregnir herma að mikill fjöldi Íslendinga eigi bókað far út til Þýskalands í dag og á morgun, en eins og staðan er í dag verður að teljast kraftaverk ef þetta fólk nær að sjá íslenska liðið leika í milliriðli - til þess þarf liðið að leggja Frakka í kvöld og það verður gríðarlega erfitt verkefni.