Þetta verður gríðarlega jafn leikur

Ulrik Wilbek, þjálfari Dana í handbolta, á ekki von á að skoruð verði mörg mörk í kvöld þegar hans menn mæta frændum sínum norðmönnum í leik upp á líf og dauða í E-riðlinum á HM.

"Ég held að þetta verði mjög jafn leikur og að mínu mati þetta 50/50 leikur, því liðin eru áþekk að styrkleika. Menn mega ekki gleyma því að við höfum jú tapað tveimur af þremur síðustu innbyrðisviðureignum okkar við Norðmenn. Við verðum að huga að línumönnunum þeirra og svo Kristian Kjelling - og ég á ekki von á að annað liðið skori yfir 30 mörk í þessum baráttuleik," sagði Wilbek.

Lið Ungverja hefur stolið senunni í E-riðlinum og hefur lagt báðar Norðurlandaþjóðirnar í fyrstu tveimur leikjum sínum. Danir og Norðmenn mætast því í hreinum úrslitaleik í kvöld um það hvort liðið fer í milliriðil - og hér er um að ræða lokaleik kvöldsins á mótinu sem hefst klukkan 19:15.