O´Neal, Walker og Posey farnir að æfa með Miami

Meisturum Miami Heat hefur borist góður liðstyrkur það sem það er nú á miðju keppnisferðalagi um vesturströnd Bandaríkjanna, því þeir Shaquille O´Neal, Antoine Walker og James Posey mættu allir á æfingu liðsins þar sem það var statt í San Francisco í dag.

Shaquille O´Neal hefur ekki spilað nema sjö leiki á tímabilinu eftir að hann fór í hnéuppskurð en er nú óðum að ná heilsu. Walker og Posey voru settir út úr liðinu eftir að þeim tókst ekki að ná settum markmiðum liðsins varðandi fituprósentu, en eru nú báðir komnir í leikmannahópinn á ný.

Næsti leikur Miami er gegn Golden State annað kvöld, en ekki hefur fengist staðfest hvort þremenningarnir verða klárir í slaginn þá. Nokkuð víst þykir að þeir Posey og Walker muni þó spila, en O´Neal verður væntanlega tekinn hægt og bítandi inn í fyrstu.

Lið Miami er eitt þeirra fimm liða sem talin eru að muni hreppa framherjann Chris Webber hjá Philadelphia, en hann verður laus allra mála á mánudaginn eftir að hann var keyptur út úr samningi sínum við Philadelphia.