Góð ferð Ármanns til Færeyja

„Ástæða ferðarinnar er sú að Færeyingar eru næstu nágrannar okkar Íslendinga, frændur og vinir ásamt Grænlendingum. Þá eru mál okkar systurtungur sem ber að rækta og efla í leiðinni. Ég vil einfaldlega opna augu heimsins fyrir þessum áhugaverðu vest-norrænu þjóðum og sérstæða menningararfi þeirra,“ segir Ármann Reynisson vinjettuhöfundur sem ferðaðist um Færeyjar í síðasta mánuði.

Ármann ferðaðist um Færeyjar á þriðju viku til þess að viða að sér efni um land og þjóð sem hann ætlar að vinna úr og skrifa vinjettur í áttundu vinjettubók sína sem áætlað er að komi út haustið 2008.

Í Þórshöfn var Aksel Hansen stórútgerðarmaður gestgjafi Ármanns og fór hann þaðan í ferðir vítt og breitt um eyjarnar. Vinjettuhöfundurinn segist hafa hitt og heimsótt fjöldann allan af fólki úr öllum geirum þjóðfélagsins, las upp vinjettur og ræddi málin. Auk þess viðaði hann að sér bókum og listaverkum.

Í ferð sinni afhenti Ármann Landsbókasafni Færeyja vinjetturitsafn að gjöf og veitti Martin Martinæs landsbókavörður bókunum viðtöku. Ármann segir að við þetta tækifæri hafi margir málsmetandi menn sýnt því áhuga að gefin verði út tvítyngd vinjettubók á færeysku og íslensku til þess að gefa fólki í báðum löndunum tækifæri til þess að kynnast betur tungumálunum sem svo auðvelt er að skilja og setja sig inn í ef áhugi er fyrir hendi.

Sjöunda vinjettubók Ármanns kemur út nú í haust þar sem meðal annars er að finna sögur frá Grænlandsferð höfundarins á síðasta ári. Færeyjaferð hans verður svo gerð skil í áttundu vinjettubókinni á næsta ári.