Ungverjar skelltu Dönum

Ellefu leikir fóru fram í dag á öðrum keppnisdegi HM í handbolta í Þýskalandi. Íslenska liðið vann auðveldan sigur á því ástralska í dag og í kvöld gerðu Ungverjar sér lítið fyrir og lögðu Dani 30-29 í E-riðli. Hér fyrir neðan eru úrslit allra leikja í dag.

Danska liðið hafði forystu nær allan leikinn í kvöld og hafði yfir 28-24 þegar skammt var til leiksloka. Ótrúlegur klaufagangur Dana og meistaraleg markvarsla ungverska markvarðarins kostuðu liðið sigurinn.

Gergö Iváncsik skoraði 7 mörk fyrir Ungverja í leiknum en Lars Christiansen sem leikur með Flensburg í Þýskalandi skoraði 10 fyrir Dani. Þetta var æsilegur endir á öðrum mótsdegi, en úrslit í öðrum leikjum voru meira eftir bókinni.

Í hinni viðureigninni í E-riðli unnu svo Norðmenn auðveldan skyldusigur á Angóla 41-13 þar sem Frank Loke skoraði 9 mörk fyrir norska liðið og Alexander Buchmann 8.

Í A-riðli vann Slóvenía 35-21 sigur á Grænlandi og Túnis vann auðveldan sigur á Kúvæt 34-23.

Í B-riðli okkar Íslendinga áttust við Frakkar og Úkraínumenn og þar sigruðu Frakkar örugglega 32-21 eins og áður hefur verið greint frá á Vísi.

Í C-riðli unnu Þjóðverjar sigur á Brasilíumönnum í gær 27-22 og í dag lögðu Pólverjar Argentínumenn auðveldlega 29-15.

Í D-riðli burstuðu Tékkar lið Katar 37-24 og þá unnu Spánverjar sigur á Egyptum 33-29 þar sem Davis Camara skoraði 7 mörk fyrir heimsmeistarana og Urios Fonseca 5, en Ahmed El Ahmar skoraði 11 og Hussein Ali Zaky skoraði 8 fyrir Egypta.

Í F-riðli gerðu svo Rússar og Suður-Kóreumenn jafntefli 32-32 þar sem Alexej Rastwortsew úr liði Medwedi Tschechow skoraði 7 mörk fyrir Rússa en Chi-Hyo Cho skoraði 8 mörk fyrir Kóreu. Króatía burstaði svo Marokkó 35-22 þar sem Vori, Vukovic, Zrnic og Sulic skoruðu 4 mörk hver fyrir Króata.