Miðaverð tífalt hærra á svörtum markaði

Stemmingin í Magdeburg var frábær í dag þegar íslenska landsliðið í handbolta spilaði sinn fyrsta leik í riðlakeppni HM. Íslendingarnir gengu skrúðgöngu á leikinn þar sem fánum var veifað og öl var teigað. Uppselt er á alla leiki í riðlinum, en þeir miðar sem enn fást á svörtum markaði hafa tífaldast í verði.

Einn þeirra Íslendinga sem Vísir náði sambandi við nú síðdegis sagði stemminguna í hópnum frábæra og sagði íslensku leikmennina sem áður spiluðu með Magdeburg hafa fengið höfðinglegar móttökur þegar þeir voru kynntir til leiks í dag. Það er mál manna að höllin verði öll á bandi íslendinga á morgun þegar liðið mætir Úkraínu í mikilvægum leik í riðlakeppninni.