FME hafnar umsókn FL Group og Jötuns Holding

Fjármálaeftirlitið hefur hafnað umsókn FL Group og Jötunn Holding um heimild til að fara með allt að 39,9% eignarhlut í Glitni.

Heimild FL Group til að fara með allt að 33% eignarhlut í bankanum stendur óbreytt og hefur ákvörðun Fjármálaeftirlitsins ekki áhrif á þá yfirlýstu stefnu félagsins um að vera langtíma kjölfestufjárfestir í Glitni eftir því sem fram kemur í tilkynningu frá félaginu. Núverandi eignarhlutur FL Group í Glitni er 31,97%.

Samkvæmt yfirlýsingu Jötun Holdings, sem send var FL Group í dag, segir m.a. að félagið hafi afsalað sér atkvæðisrétti sínum í bankanum og hefur án aðkomu FL Group hafið viðræður við FME um næstu skref, sem m.a. getur falið í sér minnkun á eignarhlut Jötuns í bankanum.

Samhliða framangreindu ferli hyggjast eigendur Jötuns skoða mögulega skiptingu eignarhluta félagsins í Glitni á milli sín, en eignarhlutur einstakra hlutahafa verður eftir sem áður án atkvæðisréttar. Eignarhlutur Jötuns Holding í bankanum er 6,85% og er félagið í eigu Baugs Group, Fons og West Coast Capital. Baugur Group er annar stærsti hluthafi FL Group og verður væntanlega sá stærsti eftir hluthafafund á morgun en Fons er í meirihlutaeigu Pálma Haraldssonar sem keypti nýverið tæp 7% í félaginu.