Federer í þriðju umferð

Hinn magnaði Roger Federer heldur áfram að fara á kostum á opna ástralaska meistaramótinu í tennis en í nótt vann hann öruggan sigur á sænska refnum Jonas Björkmann, 6-2, 6-3 og 6-2.

Hitastigið í keppninni var ekki eins rosalegt og verið hafði dagana áður og það nýtti besti tennisleikari heims sér gegn Svíanum. Federer mætir Rússanum Mikhail Youzhny í 32 manna úrslitum mótsins, en sá er í 25. sæti heimslistans.

Andy Roddick er óðum að finna sitt gamla form og lagði Marc Gicquel 6-3 7-6 (7-4) og 6-4. Hann mætir Marat Safin í næstu umferð, en Safin sigraði á mótinu árið 2005. Þá er öskubuskuævintýrið frá í fyrra, Grikkinn Marcos Baghdatis, fallinn úr keppni eftir að hann tapaði fyrir Gael Monfils í annari umferð.