Breytt lánshæfi ríkis getur haft áhrif á áhættu banka

Óli Kristján Ármannsson

skrifar

Verði stórfelldar breytingar á lánshæfi ríkisins hjá lánshæfismatsfyrirtækjum getur það haft áhrif á eiginfjárkröfur og áhættugrunn fjármálafyrirtækja.

Samkvæmt drögum að reglum sem byggja á Basel II grunni og Fjármálaeftirlitið sendi fjármálafyrirtækjum til umsagnar í nóvember, hefur lækkun Standard & Poor‘s á lánshæfi ríkisins 22. desember ekki áhrif á áhættu í útlánum bankanna.

Detti hins vegar einkunn ríkisins hjá S&P niður í A+ til A- eru vörpunaráhrif í þrep útlánagæða bankanna sögð vera 20 prósent. Þannig myndu 20 prósent af einhverri fjárhæð sem fjármálafyrirtæki ætti sem kröfu á ríkið færast inn í þann grunn sem eiginfjárkrafa fyrirtækisins er reiknuð út frá.

„Í nýju reglunum er það þannig að kröfur á ríki og Seðlabanka hafa ákveðið vægi í eiginfjárgrunni fyrirtækja. En það þyrfti að breytast ansi mikið lánshæfismatið til að það hefði einhver áhrif,“ segir Guðrún Jónsdóttir, sérfræðingur Fjármálaeftirlitsins. Hún vísar til þess að í reglum fjármálaeftirlitsins sé vörpun á lánshæfismati stóru lánshæfismatsfyrirtækjanna þriggja, Fitch, Moody‘s og Standard & Poor‘s yfir í tilmæli um eiginfjárstöðu fjármálafyrirtækja.

„Þar er nokkuð breytt bil, þannig gefur sama vægi einkunn frá AAA til AA- hjá Standard & Poor‘s. Breytingin núna síðast hefur engin áhrif á þá áhættuvog sem kröfur á ríkissjóð hafa. Ríki hafa mjög gjarnan núll í áhættuvog, en kröfur á ríki, alla vega í hinum vestræna heimi, eru almennt ekki taldar hafa í för með sér neina áhættu.“

Guðrún segir að fari svo ólíklega að lánshæfismat ríkisins lækki svo verulega að það hafi einhver áhrif kalli það á nokkuð flókinn útreikning áður en hægt verður að meta áhrifin á kröfuna um eigið fé fjármálafyrirtækja. Þar geti munað nokkru á milli fyrirtækja eftir því hversu miklar kröfur fyrirtækin kunna að hafa á ríkið.