Skýringar Kaupþings róa erlenda fjárfesta

Kaupþing tilkynnti í gær um lok fjármögnunar vegna yfirtökunnar á hollenska bankanum NIBC. Skuldatryggingarálag (CDS) bankans lækkaði í kjölfarið um 65 punkta.

Álag á skuldabréfaútgáfu hinna bankanna minnkaði líka. Kaupþing gerir ráð fyrir að kaupin á NIBC verði að fullu frágengin í janúar næstkomandi.

Kaupþing hefur tilkynnt um lok fjármögnunar vegna yfirtökunnar á hollenska bankanum NIBC. Um leið greinir bankinn frá því að stöður í sérvörðum skuldabréfum (e. structured credit) verði minnkaðar og gerir ráð fyrir 85 milljóna evra gjaldfærslu á fjórða ársfjórðungi vegna þessa. Í tilkynningu bankans í gær er jafnframt greint nánar frá fjármögnun bankans og lausafjárstöðu.

Upplýsingarnar höfðu strax áhrif á alþjóðlegum fjármálamarkaði, en álag á skuldatryggingar bankans (CDS) hafði lækkað um 65 punkta um miðjan dag í gær. Álagið er mat fjárfesta á áhættu tengdri bankanum og hefur áhættumatið því minnkað sem þessu nemur.

Álagið er engu að síður mjög hátt og hærra en á aðra evrópska banka, eða um 275 punktar. Þá nutu Landsbankinn og Glitnir einnig góðs af þróuninni, álag á bréf þeirra lækkaði um 50 og 35 punkta, í 145 hjá Landsbankanum og 205 punkta hjá Glitni.

Fram kemur í tilkynningu Kaupþings að bankinn hyggist gefa út nýtt hlutafé allt að 210 milljónum hluta vegna yfirtökunnar á NIBC. Seljandinn, hópur fjárfesta undir forystu J.C. Flowers & Co., fær í sinn hlut 140 milljónir hluta í Kaupþingi á meðalverðinu 105,67 sænskar krónur.

Seljendur NIBC verða við þetta næststærsti hluthafi Kaupþings með um 15,9 prósenta hlut. Að auki greiðir Kaupþing fyrir NIBC 1.392 milljónir evra.

„Á sínum tíma kvað samningurinn um kaupin á um ákveðna peningagreiðslu og 110 milljónir hluta til viðbótar. Nú er búið að breyta peningagreiðslunni og koma í staðinn 140 milljónir hluta," segir Jónas Sigurgeirsson, forstöðumaður samskiptasviðs Kaupþings.

Verðið sem Kaupþing greiðir fyrir bankann nemur miðað við þetta um 2.750 milljónum evra. Þá ætlar Kaupþing að gefa út 70 milljónir hluta og selja í forgangsréttarútboði eftir að kaupin á NIBC eru frágengin. J.C. Flowers & Co. og Exista hafa gert samkomulag um að sölutryggja útboðið.

Kaupþing gerir ráð fyrir að kaupin á NIBC verði að fullu frágengin í janúar 2008, en þau bíða engu að síður samþykkis fjármálayfirvalda bæði hér og í Hollandi.

Um miðjan desember á svo að vera fullu lokið samdrætti Kaupþing í stöðum í sérvörðum skuldabréfum, úr 1,6 milljörðum evra í 450 milljónir evra.

„Samhliða áformar bankinn að loka 1,3 milljarða evru lausafjárlínu sem bankinn hefur veitt og mun þá ekki vera með slíkar skuldbindingar gegnum lánalínur í tengslum við stöður sínar í sérvörðum skuldabréfum (e. structured credit exposure)," segir í tilkynningu bankans. Þá kemur fram að Kaupþing sé ekki með beinar stöður í bandarískum undirmálslánum (e. sub-prime) eða skuldavafningum (e. CDOs) sem innihaldi slík lán.

Kaupþing hefur hins vegar óbeina stöðu tengda undirmálslánum þar sem bankinn veitti lán til seljanda NIBC til að fjármagna eignatryggð skuldabréf tengd undirmálslánum sem skilin voru frá í kaupunum á NIBC. „Þetta lán hefur nú verið lækkað úr 236 milljónum Bandaríkjadala í 136 milljónir en nafnvirði undirliggjandi eigna nemur sem fyrr 689 milljónum Bandaríkjadala." Eftir þessi viðskipti á NIBC engar eignir í bandarískum undirmálslánum.

Fram kemur að bæði samstæða Kaupþings og móðurfélag hafi öruggt lausafé til að standa við allar skuldbindingar bankans í meira en 420 daga, en þar er með talin peningagreiðslan vegna kaupanna á NIBC.