Tannheilsu Íslendinga hrakar

Tannheilsu Íslendinga hrakar mjög. Tuttugu og tvö þúsund börn fara á mis við tannlæknaþjónustu, segir tannlæknir sem gefur heilbrigðiskerfinu falleinkunn.

Tannheilsa þjóðarinnar var hörmuleg hér á árum áður og áttu Íslendingar met í tannátutíðni Vesturlanda. Brugðist var við þessu árið 1974 þegar Tryggingastofnun samdi við tannlæknastéttina um læknisþjónustu sem varð til þess að tannheilsan stórbatnaði og mesta lækkun í tíðni tannskemmda í Evrópu varð staðreynd, segir Sigurjón Benediktsson tannlæknir á Húsavík.

En nú hefur aftur sigið á ógæfuhliðina. Frá árinu 1998 hafa engir samningar verið í gildi við tannlækna og vantar mikið upp á að styrkir Tryggingastofnunar dugi til að greiða upp tannlæknakostnað. Foreldrar barna til átján ára fá aðeins 30-40% af kostnaði sem verður til þess að stór hluti íslenskra barna fer ekki til tannlæknis eða 22.000 börn að sögn tannlæknisins.

Sigurjón segir þær upplýsingar alrangar sem fram hafa komið á alþingi í fyrirspurn til heilbrigðisráðherra að Íslendingar sætu við saman borð og Norðurlöndin hvað tannheilsu varðar.

Sigurjón bjó til töflu upp úr upplýsingum alþjóða heilbrigðisstofnunarinnar, WHO, og í henni sést hve óhagstæður samanburður Íslendinga er miðað við aðrar Norðurlandaþjóðir. Aðeins rúmur fimmtungur íslenskra barna var árið 2005 með allar tennur óskemmdar en ríflega sex af hverjum tíu sænskum börnum voru þremur árum fyrr með allar tennur heilar. Íslendingar reka lestina í tannheilsu Norðurlandaþjóðanna.