Ekkert tilboð borist í Ragnar

Ragnar Sigurðsson segir í samtali við sænska fjölmiðla að ekkert tilboð hafi borist IFK Gautaborg í sig og að hann muni sennilega skrifa undir nýjan samning við félagið.

„Ég held að við munum komast að samkomulagi," sagði Ragnar en umboðsmaður hans, Arnór Guðjohnsen, og yfirmaður íþróttamála hjá IFK, Håkan Mild, hafa rætt saman að undanförnu um nýjan samning.

„Eins og staðan er nú verð ég áfram hjá IFK Gautaborg."

„Mér hefur verið boðinn nýr samningur en ég er ekki búinn að skrifa undir neitt. Ég er þó alls ekki hræddur við að skrifa undir samninginn. Ég hef það afskaplega gott í Svíþjóð og spila með besta liðinu."

Ragnar á tvö ár eftir af núverandi samningi sínum en segist vera tilbúinn fyrir stærri áskorun.

„Ef það kæmi tilboð væri athyglisvert að skoða það. Ég er tilbúinn í eitthvað stærra. Margir hafa rætt um að ég þurfi að vera í Svíþjóð í eitt eða tvö ár í viðbót til að öðlast reynslu og þroska en maður aðlagast aðstæðum. Ef maður fer í betra lið verður maður sjálfur betri knattspyrnumaður."

Ragnar var hrósað í hástert fyrir frammistöðu sína á liðnu tímabili og segir hann að það verði erfitt að fylgja því eftir á því næsta.

„Tímabilið var frábært. Ég fékk jákvæða gagnrýni fyrir hvern einasta leik. Það verður erfitt að fá betri gagnrýni. En ég get orðið betri og ef ég verð áfram mun ég halda áfram að bæta mig."