Greining Kaupþings gerir ekki ráð fyrir stýrivaxtahækkun

Greiningardeild Kaupþings gerir ekki ráð fyrir vaxtahækkun á næsta vaxtaákvörðunarfundi Seðlabankans þann 20. desember.

Í umfjöllun um málið í Hálf fimm fréttum deildarinnar segir m.a. að mikið vatn hafi runnið til sjávar frá síðasta vaxtaákvörðunarfundi bankans 1. nóvember síðastliðinn - lausafjárskortur á alþjóðamörkuðum er enn viðvarandi og hlutabréfaverð hefur haldið áfram að lækka um allan heim.

"Það er nú ljóst að lausafjárkrísan mun brátt fara að verka sem hemill á íslenska hagkerfið þar sem lánakjör hafa versnað í útlöndum og íslenskar lánastofnanir eru orðnar mjög tregar til útlána líkt og systur þeirra ytra. Flest bendir til þess að veðrabrigði séu í nánd hérlendis með kólnun hagkerfisins - um leið og jólaskapið rennur af mönnum á nýju ári og gríðarlega háir raunvextir fara að segja til sín."

Greiningardeildin segir að við þetta bætist einnig að síðasta vaxtahækkun þann 1. nóvember síðastliðinn hefur skilað verulegu aðhaldi, s.s. með hækkun á vöxtum allra fasteignalánveitenda hérlendis. Aukinheldur hafa þeir lykilatburðir sem nefndir voru í síðustu Peningamálum sem ástæða fyrir frekari vaxtahækkunum - þ.e. nýir kjarasamningar og lækkun krónunnar - ekki komið fram.

Það er ólíklegt að mati Greiningardeildar að Seðlabankinn hækki vexti ofan í ógerða kjarasamninga eða ósamþykktar skattalækkanir af hálfu ríkisins - enda engin ástæða til þess að ætla að óreyndu að aðilar vinnumarkaðarins fari út fyrir sett mörk varðandi efnahagslegan stöðugleika.