Barist um blómin

Stjórnendur bresku stórmarkaðakeðjunnar Tesco eru sagðir hafa setið á stífum fundum undir lok síðustu viku og metið stöðuna eftir að auðjöfurinn Sir Tom Hunter, ríkasti maður Skotlands, flaggaði rúmum fimmtungshlut í skosku garðvörukeðjunni Dobbies Garden Centers. Kaupþing í Bretlandi fjármagnaði kaup félags Hunters á bréfunum.

Útlit er fyrir að Hunter ætli sér að koma í veg fyrir yfirtöku Tesco á garðvöruversluninni en til þess þarf hann 25 prósenta hlut. Talið er að frekari kaup verði í samstarfi við Baug og fleiri sem Hunter hefur unnið með áður.

Haft er eftir greinanda hjá Singer & Friedlander, dótturfélagi Kaupþings í Bretlandi, í breska dagblaðinu Herald að baráttan um bréf Dobbies geti leitt til þess að Tesco hækki boð sitt, sem hljóðaði upp á jafnvirði 19,7 milljarða íslenskra króna.

Félag Hunters, sem átti fyrir rúman 10 prósenta hlut, greiddi 1750 pens á hlut fyrir 10 prósent til viðbótar. Það er 250 pensum betur en boð Tesco hljóðaði upp á fyrir tæpum hálfum mánuði.