Kvikmyndar söngelska karlmenn

Þorsteinn J. Vilhjálmsson er að leggja lokahönd á nýja mynd sem heitir The Boheminas. Myndin fjallar um félagsskap karla í Dublin sem hittast einu sinni í viku í þeim tilgangi að syngja hver fyrir annan. Félagsskapurinn var stofnaður árið 1897 og skipar um 150 manns, flesta á áttræðis eða níræðis aldri.

“Kjarninn í þessu eru orð sem eru orðin innihaldslaus og hallærisleg, það er vinátta og að njóta samvista hver við annan,” segir Þorsteinn. “Þessi ástríða fyrir söngnum og tónlistinni er mjög merkileg því það eru bæði í félaginu söngvarar sem syngja og líka þeir sem eru “non-performance”, sem eru bara með til að njóta tónlistarinnar. Það eru allir með, hvort sem þeir hafa eitthvað að leggja af mörkunum eða ekki.”

Að sögn Þorsteins er félagsskapurinn karlavígi þar sem haldið er í gamlar hefðir. “Konur fá ekki aðgang að skemmtunum klúbbsins nema tvisvar á ári þegar þeim er boðið í dinner.”

Þorsteinn heyrði fyrst af félagsskapnum í gegnum írskan vin sinn. Kom sér í samband við félagið og fékk að mynda eina kvöldstund. Í myndinni er bæði rætt við og hlustað á tóna söngfuglanna sem og fyglst með þegar ungur konsertpíanisti er boðinn velkominn í hópinn.

Þorsteinn er að leggja lokahönd á myndina en hann hefur setið sveittur yfir klippingum síðustu mánuði. Brot úr myndinni má sjá á heimasíðu hans, thorsteinnj.is, en ætlunin er að frumsýna myndina í sjónvarpi eða kvikmyndahúsi í september.