Vopnin kvödd

Nú er rétt um mánuður síðan félagið Keilir var stofnað. Óhætt er að segja að viðtökur hafi verið framar björtustu vonum. S.l. laugardag komu t.d. 15-17 þúsund manns á opinn dag til að kynna sér fyrirhugað starf Keilis og aðstæður á Keflavíkurflugvelli.

Verkefni Keilis er harla óvenjulegt, þ.e. að gæða yfirgefið þorp lífi þar sem hundruð glæsilegra íbúða, skóla, verslana, afþreyingarmiðstöðva og atvinnuhúsnæðis bíða þess eins að fá nýtt hlutverk í nýju samfélagi. Fagna ber þeirri ákvörðun að leggja upp með áherslur á menntun. Keilir er sem sagt nýjasta viðbótin í skólaflóru okkar Íslendinga.

Félagið er í eigu fjölmargra fyrirtækja og stofnana þar sem Háskóli Íslands er stærsti hluthafinn. Ætlunin er að hefja kennslu í frumgreinadeild og mæta þar með mikilli þörf á svæðinu. Þá verður og kennt á háskólastigi og svonefndum fagháskóla – starfstengdu námi er teygir sig bæði inn á framhaldsskóla og háskóla. Segja má að lengi hafi verið kallað eftir starfstengdu námi á þessu skólastigi. Í framtíðinni er stefnt að kennslu innan vébanda Keilis á fjölmörgum sviðum á vegum atvinnulífsins, s.s. Flugakademíu, Kvikmyndakademíu, Lista-og afþreyingasviði, öryggissviði o.s.frv. Keilir mun til að byrja með leggja áherslu á fimm klasa: orku- og umhverfisklasa, samgöngur, öryggismál, heilbrigðis- og íþróttaklasa, listir og afþreyingu.

Runólfur Ágústsson, framkvæmdastjóri, sagði við vígsluna að í stað varnarliðs kæmi nú sóknarlið á Völlinn. Eru það orð að sönnu því hvergi er sókn jafn árangursrík sem á sviði menntunar. Keilir mun hafa milligöngu um útleigu glæsilegra nemendaíbúða fyrir sína nemendur og nemendur háskólanna á höfuðborgarsvæðinu. Vinnst þar tvennt: Gengið er á langan biðlista eftir nemendaíbúðum í Reykjavík en samhliða verður hraðað uppbyggingu innviða fyrir skólaþorpið á Vellinum. Í haust er þannig stefnt að því að opna leikskóla, verslun, veitingahús, háskólakrá, kaffihús, heilbrigðisþjónustu og aðrir þá þætt sem heilbrigt samfélag þarf á að halda. Ákvörðun um stofnun Keilis og uppbyggingu háskólasamfélags á Vellinum er sögulegt framfaraspor.

Höfundur forstöðumaður fagskóla Keilis.