Ráðlagt að senda ekki frá sér afkomuviðvörun

Eggert Þór Aðalsteinsson

skrifar

Afkoma tískuverslanakeðjunnar Mosaic Fashions var langt undir væntingum greiningardeilda bankanna á þriðja ársfjórðungi. Mosaic skilaði 1,4 milljóna punda tapi (195 milljónum króna) á tímabilinu en til samanburðar gerði meðaltalsspá bankanna út frá upphaflegum spám ráð fyrir að hagnaður félagins yrði 7,8 milljónir punda eða 1,1 milljarður króna.

Greiningardeild Kaupþings telur að full ástæða hefði verið fyrir félagið að senda frá sér afkomuviðvörun til Kauphallarinnar. Bréf í Mosaic lækkuðu um nítján prósent á síðasta ári, þar af um þrettán prósent á fjórða ársfjórðungi og um 4,4 prósent á síðasta viðskiptadeginum 2006.

Richard Glanville, fjármálastjóri Mosaic, sagði í samtali við Markaðinn að ekki hefði þótt ástæða til að gefa út afkomuviðvörun að fenginni ráðgjöf íslenskra ráðgjafa sem er Kaupþing. Bæði töldu menn að íslenski markaðurinn hefði verið vel upplýstur um erfiðar aðstæður í breskri smásölu út frá skrifum sérfræðinga og fjölmiðla og auk þess birti félagið reikninga sína fjórum sinnum á ári sem eigi að gefa góða mynd af stöðu félagsins á hverjum tíma. „Ég tel að í Bretlandi þar sem menn tilkynna um afkomu félaga með sex mánaða millibili verði þetta mun mikilvægara. Þar sem við greinum frá afkomu okkar á þriggja mánaða fresti voru skilyrði fyrir afkomuviðvörun ekki til staðar að okkar mati.“

Bent hefur verið á að mikil hlýindi í Bretlandi í haust hafi dregið úr sölu á fatnaði og þá á Oasis, stærsta vörulínan sem skapar 40-45 prósentum af heildartekjum félagsins, í vandræðum. Þótt vel gangi í erlendri útrás félagsins verða 80 prósent af tekjum Mosaic til á heimaslóðum.

Guðmunda Ósk Kristjánsdóttir, hjá greiningu Landsbankans, vill ekki taka svo sterkt til orða að þörf hefði verið á afkomuviðvörun þótt uppgjörið hefði klárlega verið undir væntingum. Áætlanir stjórnenda Mosaic hafa verið að lækka jafnt og þétt yfir reikningsárið í kjölfar uppgjöra. „Það hefur verðmyndandi áhrif á Mosaic að þeir eru ekki að ná markmiðum sínum.“

Guðmunda Ósk segir að stjórnendur Mosaic sjái ekki fram á viðsnúning hjá stærstu vörulínu félagsins fyrr en um næstu páska. Smásöluverslun í Bretlandi er í lægð og bendir hún á að breskir smásalar hafi verið að greina frá dræmum sölutölum í aðdraganda jólanna. Nóvembersalan gekk illa hjá Mosaic í Bretlandi en samkvæmt forsvarsmönnum Mosaic var viðsnúningur í kringum jólasöluna sem Glanville staðfestir.

Glanville segir ennfremur að janúar hafi farið vel af stað hjá keðjunni. „Eftir langt tímabil af niðurstöðum sem hafa verið undir væntingum erum við bjartsýnir á framhaldið. En því má ekki gleyma að hlutirnir breytast hratt á þremur til fjórum vikum hjá okkur í smásölunni.“