Virðisaukaskattur á geisladiska lækkaður í sjö prósent

Ríkisstjórnin samþykkti á fundi sínum í fyrradag, að tillögu Árna M. Mathiesen fjármálaráðherra, að leggja til við alþingi að virðisaukaskattur á geisladiska verði lækkaður í 7 prósent. Mun lækkunin taka gildi þann 1. mars 2007 um leið og aðrar boðaðar breytingar taka gildi á virðisaukaskattslögunum. Þetta kemur fram í tilkynningu frá fjármálaráðuneytinu. Með þessu er komið til móts við óskir tónlistarmanna og hljómplötuframleiðenda en þeir höfðu gagnrýnt að í tillögum ríkisstjórnarinnar væri gert ráð fyrir lækkun á virðisaukaskatti á bókum og tímaritum en ekki hljómdiskum. Með því væri samkeppnisstaða milli listgreinanna skekkt. Frumvarp um málið verður lagt fram á alþingi á næstu dögum.