Tveir vopnaðir menn handteknir í efra Breiðholti

Sérsveit lögreglunnar var kölluð til á þriðja tímanum í nótt eftir að tilkynning barst um að tveir menn vopnaðir haglabyssu gengu um í efra Breiðholti. Vitni sögðu manninn hafa hleypt skoti af í götuna og síðan gengið í átt að Elliðaárdalnum. Þar hafði lögreglan uppi á þeim.

Annar mannanna hlýddi tilmælum lögreglunnar strax en hinn þurfti hún að yfirbuga eftir þónokkur átök. Ekki er vitað hvað manninum, sem er á fimmtugsaldri, gekk til en lögreglan segir þó mildi þykja að enginn hafi slasast.

Mennirnir voru báðir færðir í fangageymslur lögreglu og verða þeir yfirheyrðir með morgninum.