Balic of stór biti fyrir íslenska liðið

Króatar höfðu nauman sigur á íslenska landsliðinu í handbolta á EM í Sviss nú rétt í þessu 29-28 í hörkuleik. Það var ekki síst fyrir stórleik Ivano Balic sem lið Króatíu náði að tryggja sér sigurinn, en hann skoraði 8 mörk í leiknum, mörg þeirra á ótrúlegan hátt og var gríðarlega mikilvægur í varnarleiknum. Ólafur Stefánsson var markahæstur í íslenska liðinu með 8 mörk og Guðjón Valur Sigurðsson skoraði 7.

Snorri Steinn Guðjónsson skoraði 4 mörk, Róbert Gunnarsson 3, Einar Hólmgeirsson og Arnór Atlason 2 og Ásgeir Örn Hallgrímsson 1.

Rússar og Króatar eru því efstir og jafnir í riðlinum með 6 stig, Ísland hefur 5, Danir 3, Serbar 2 og Norðmenn ekkert stig. Leikur Dana og Norðmanna er á dagskrá síðar í kvöld. Íslendingar mæta Norðmönnum í lokaleik sínum í milliriðlinum á morgun.